Tuesday, December 25, 2018

പെൺകരുത്തിൻ അടയാള മതിൽ

ഇന്നീക്കയ്കളിൽ ബന്ധനമില്ല
ഇന്നീക്കാലുകൾ കെട്ടിയിട്ടില്ല
ഇന്നു ഞങ്ങൾ ഉയിർത്തെഴുന്നേറ്റോർ
ഒന്നിച്ചൊറ്റയായ് വന്മതിൽ തീർത്തോർ.

പണ്ടു നിങ്ങൾ മിഴി തുറിച്ചെന്നാൽ
മണ്ടിയോടിയ പേടമാനല്ല.
വേണ്ട, വേണ്ടാ ഭയപ്പെടുത്തേണ്ട
ധൈര്യമുള്ളോർ,വനിതകൾ ഞങ്ങൾ.

ദേവിയാക്കേണ്ട,ശ്രീകോവിൽ വേണ്ട
പാദപൂജയും നേദ്യവും വേണ്ട
തലയിലേറ്റേണ്ട,കാൽക്കലുമല്ല
തുല്യതക്കായ് പൊരുതുവോർ ഞങ്ങൾ.

ഇല്ല ജാതി,മതങ്ങളും വർണ്ണ-
വൈരവുമില്ല ഞങ്ങളൊന്നാണേ!
വിഭജനത്തിന്റെയല്ലിതു,മൂല്യങ്ങൾകാത്തു-
രക്ഷിക്കും പെൺകരുത്തിൻ മതിൽ.

ഇന്നുഞങ്ങളുയിർത്തെഴുന്നേറ്റോർ
ഒന്നിച്ചൊറ്റയായ് പെൺമതിൽ തീർത്തോർ കണ്ടുകൊള്ളൂ,ഇളക്കമേൽക്കില്ലാത്ത പെൺകരുത്തിന്നടയാളമീ മതിൽ!

No comments:

Post a Comment