മണ്‍വെട്ടി

എനിക്ക് ചിലത് പറയാനുണ്ട്,
ചോദിക്കാനും...

ഇരുംബെന്ന നിലയില്‍ കിടന്ന എന്നെ
മണ്‍വെട്ടിയിലേക്ക്
പരിവര്‍ത്തനം ചെയ്തവരോട്
ചിലത് പറയാനുണ്ട്,
ചോദിക്കാനും...

മണ്ണും ഞാനും തമ്മിലലിഞ്ഞു കിടന്ന
കാലത്തെ കുറിച്ച്,
പ്രണയാതുരമായ,
കാലമില്ലായ്മയെ കുറിച്ച്...
തത്വചിന്തകളോ മതങ്ങളോ
ഇല്ലാതിരുന്ന അവസ്ഥയെ കുറിച്ച്...

മണ്ണില്‍ നിന്നുമെന്നെ അടര്‍ത്തി
അതേ മണ്ണിനെ വെട്ടിക്കീറാനും
ഭൂമിയെ തകര്‍ക്കാനും
നിയോഗിയ്ക്കപ്പെട്ട
എന്റെ അടിമത്തത്തിന്റെ നാളുകള്‍ ...
എന്റെ പ്രണയത്തില്‍
കൊമ്പ് കോര്‍ത്തുയരുന്ന കെട്ടിടങ്ങള്‍ ...

ഇന്ന്,
ഞാന്‍ കാത്തിരിക്കുന്നു
നുണകളെ,
അഹങ്കാരത്തെ ,
നിന്റെ ദുരാഗ്രഹത്തേയും
കുഴിച്ചുമൂടാന്‍ പാകത്തിലൊരു
കൈ എന്നെ തേടിയെത്തുന്നതിനായി.

കള്ളിച്ചെടി

നിങ്ങള്‍ക്കിടയില്‍
ഞാനുണ്ട് ,
നിറമോ മണമോ ഇല്ലാതെ ,
പൂക്കളോ തണലോ
ഇല്ലാതെ .
വർണ്ണിയ്ക്കപ്പെടാതെ,
പാടിപ്പുകഴ്ത്തപ്പെടാതെ ...
തീക്കാറ്റിൽ 
വാടാതെ
മണല്‍ക്കാട്ടിലും
പച്ചപ്പുപടര്‍ത്തി,

കുഞ്ഞു തുമ്പിയെപ്പോലും
പ്രലോഭിപ്പിയ്ക്കാതെ...
കൂര്‍ത്തു മൂര്‍ത്തങ്ങിനെ
വളഞ്ഞും പുളഞ്ഞും.

തൊട്ടുനോക്കാന്‍ വന്നവര്‍ കൈകുടഞ്ഞു.

വിരല്‍ത്തുമ്പിലെ ചോര പിന്നിലൊളിപ്പിച്ച്‌,

"ഹാവൂ ആരും കണ്ടില്ലെ"ന്നാശ്വസിച്ചു.

റോട്ട് വീലറിന്റെ പെഡിഗ്രി

എയര്‍കണ്ടീഷന്റെ തണുപ്പില്‍
പൂച്ചക്കുട്ടിയ്ക്കു ചൂടുപകരാന്‍
കമ്പിളിപ്പുതപ്പു തിരയുന്ന ഞാന്‍
അതിശൈത്യത്തില്‍,
അല്പവസ്ത്രത്തില്‍
തെരുവിലുറങ്ങുന്നവരെപ്പറ്റി
ചിന്തിയ്ക്കാറില്ല.

പുകമഞ്ഞു പാത മറച്ചപ്പോള്‍
മുടങ്ങിയ വിമാനത്തെ ക്കുറിച്ച്
ഞാന്‍ ആകുലയാണ്.
പുതിയ *റോട്ട് വീലറിന്റെ *പെഡിഗ്രി
അതിലാണ് വരുന്നത്.
ഡോഗ് ഷോ നാളെയല്ലേ !

ആയിരങ്ങള്‍ ഷെല്ട്ടറില്ലാതെ
തണുപ്പേറ്റു മരിച്ചാലെനിയ്ക്കെന്ത് !
കോമണ്‍വെല്‍ത്ത് ഗെയിംസിനു മുന്‍പ്
നഗരം വൃത്തിയാകുമല്ലോ .


*റോട്ട് വീലര്‍:വില പിടിപ്പുള്ള ,മുന്തിയ ഇനം വളര്‍ത്തു പട്ടി.
*പെഡിഗ്രി :കെന്നല്‍ ക്ലബ്ബുകള്‍ നായകളുടെ വംശശുദ്ധിക്ക്‌ നല്‍കുന്ന സര്‍ട്ടിഫിക്കറ്റ്‌ .